姑勿論泛民嘅如意算盤打唔打得響，但外界早就覺得由立法會調查呢宗涉及桃色緋聞嘅事件，公開聆訊嘅證供就變得好八卦，令市民覺得好似睇緊娛樂新聞咁。

參考外國個案偷師

本來政治圈就係娛樂圈，睇你用乜嘢角度去睇啫。之不過，呢次係立法會成立十二年幾以嚟，首次引用《基本法》彈劾議員嘅機制，一宗嚴肅嘅政治事件點可以變成娛樂新聞㗎，尤其甘威事件或多或少已經影響立法會嘅整體形象，若果連調查委員會都變得咁八婆，肯定淪為笑柄，屆時嘅影響將更大。

為確保立法會嘅形象唔受損，每一步都要做得好小心，仲要執正嚟做。立法會秘書處對今次調查煞有介事，仲會由秘書長吳文華（Pauline）親自操刀，坐落調查委員會做秘書實。Pauline趕緊參考外國調查類似事件嘅個案，從中吸取經驗，藉此確保調查委員會無論係閉門會議或者公開聆訊都能夠按規程去做，仲要勒住班議員提問時唔好過晒火位。睇嚟到時Pauline真係要揸住把間尺做嘢喇！

雖然甘威前女助理王麗珠公開發表嘅六點聲明中，表明希望就此作罷，唔會出席調查委員會嘅聆訊，若果調查委員會決定引用立法會權力及特權法傳召佢嘅話，佢無可避免都要出席聆訊同作供。

咁顧得班議員，仲要顧埋嚟作供嘅人。王麗珠係事件嘅原告，一旦喺調查委員會曝光，勢成焦點，咁點樣可以令到呢位女主角喺聆訊中唔被矮化或畀人帶有色眼鏡去睇，仲要能夠有尊嚴咁協助委員會調查事件，都係一個棘手難題，睇怕Pauline要諗爆頭。