小白觀點:納稅人唔係水魚
港足打敗小日本,平時尚有一啲理性嘅香港人,突然個個北望神州,變晒做憤青,又有人抬番風之后講過嘅金句出嚟,話「香港運動員唔係垃圾」喎。好心唔好咁大聲啦,如果呢句說話成立嘅話,咁香港運動員長期喺世界賽事陪跑,係咪印證咗大多數時間仍然係垃圾?
仲有喎,香港已經回歸咗十二年,為乜仍然有咁狹隘嘅地域性思維,要分中國運動員同香港運動員?播咗咁多年國歌有乜成效?睇吓啲明星仔迫於無奈要大合唱《義勇軍進行曲》就知啦,咪嘴都跟唔上,公民教育委員會使咗納稅人咁多錢,咁啱依家稅關臨近,本人要大嗌一聲「香港納稅人唔係水魚」,回水呀!
網友觀點……
鋒哥
使乜又拎番呢句出嚟講呀,咪又係自卑心作祟,自己當自己係垃圾至咁講啫。
Chill
臨尾射十二碼,真係見到啲球員腳仔軟,個波慢慢碌入網。
Jo
香港隊好嘢,我哋支持支持,香港一定得!
香港隊
香港隊即刻變成明星隊咁呀!政府應該畀多啲資源支持各類運動啦,唔係有得贏先至話搞㗎。
網址:www.sunsiupak.blogspot.com
阿豪觀點:政府齋噏撐體育
香港足球隊踢贏日本,令全港足球員即刻可以挺直腰板,講一句「香港運動員唔係垃圾」。但問題係,贏咗就唔係垃圾,咁其他輸咗嘅隊伍點算?
話時話,豪伯都有唔少朋友平時根本唔會睇香港波,最多都係講得出「和仔」個名,但見佢哋前日都坐定定喺電視機前打氣,仲嗌到聲都拆埋添!
所以話呢,香港人幾咁可愛吖。最重要嘅係,大家嘅支持並唔係空口講白話,大家都爭住買飛捧香港隊場。總好過政府吖,平時講到體育幾咁支持關心,一講到錢咪又係算死草!香港運動員固然唔係垃圾,至於邊個係垃圾,相信都唔使多講喇啩?
網友觀點……
Z.甘道夫
香港足球隊只係吐氣揚眉,喺最唔睇好嘅一項運動拎金牌,其他輸咗只係佢哋冇派全陣嚟香港,唔需要諗咁多。
波係圓嘅
今次港隊贏得漂亮!
一條小草
以港隊咁嘅資源都可以贏到金牌,絕對有交代,希望政府唔好再懶懶閒,畀多啲資源推廣運動!
撐港足
同政府講咩都嘥氣,有獎攞就有資助,冇獎攞就咩都冇,若港隊今次輸咗,咪又打回原形!
網址:www.lukchiho.blogspot.com