喺國際機場擺放展板，提醒各國旅客關注環保，節約能源，本來係好事，可惜當局做戲咁做，根本冇節能意識，結果嗰塊展板變成浪費能源嘅樣辦，真係笑死人！

話時話，塊展板又幾有氣勢o架，三米高、十二米長，擺喺機場客運大樓離境大堂，日夜有三十八支射燈照住。咦，客運大樓四周都係玻璃牆，日間不知幾光猛，使唔使開咁多燈呀？所以話啫，當局宣傳節能係假，帶頭嘥電至真，直情係自摑嘴巴！

不過，有咁嘅事一啲都唔奇，因為當局喺環保方面不嬲都係講一套做一套。嗱，就以機場嚟講，本來機場客運大樓採用玻璃牆設計，就係為咗增加採光，節省電力，但實情係，客運大樓日光日白一樣燈火長明，咪以為係機管局一時疏忽，機場啟用嗰日起就係咁樣嘞。有環保團體早就向當局提出過，但係班官員根本聽唔入耳。

對於機場狂嘥電，環保署話喎，已經為政府建築物訂立能源效益、溫室排放等目標，而且將會斥資四億五千萬推動節能、節水等工程，進一步改善政府建築物嘅環保表現咁話。

大家千祈唔好太開心，呢種官腔早就聽得多喇，可惜每次都係得個噏字，幾時有改善過吖。好似機電工程署，斥資七億幾起新總部大樓，又用五千幾萬安裝再生能源設施，話可以每年節省四十幾萬電費，點知耗電量唔單止冇減，反而增加咗三、四成，大樓啟用頭三年，多繳五百幾萬蚊電費。佢哋自吹係「節能先鋒」，其實係「嘥電先鋒」至真。廉政公署新辦公大樓亦一樣，話係環保設計，點知耗電比預期超出咗一倍幾。

叮！其實好多政府部門同公營機構都係洗腳唔抹腳，佢哋冇其他嘢叻，最叻就係浪費能源，如果要列名單，有一匹布咁長。嗱，政府大力推廣慳電膽，聲稱可以節省能源，但有人踢爆，好多部門辦公樓仲用緊鎢絲燈膽。當局講一套做一套，你話幾離譜。

政府近年忽然環保，成效有幾大？大家出街行兩個轉就知啦，個天成日灰蒙蒙，空氣污染指數經常爆晒燈，藍天就見唔到喇，浪費能源就見得多。

一句講到尾，全香港最冇環保意識嘅就係政府，班官員得把口叫人哋節約能源，自己就帶頭浪費能源，咁搞法，就算市民嘅環保意識點樣提高都冇用啦。所以呢，政府如果要推動環保，唔係靠擺巨型展板，而係將浪費能源嘅部門揪出嚟，叮爆佢哋鎯鎯！