小白觀點：打針前食飽好上路

特區政府宣布為二百萬人注射豬流感疫苗，首批即日上市，但係疫苗到底有乜副作用？易唔易中招呢？其實疫苗安唔安全，睇吓班高官嘅反應就知，周一鑊答得最過癮，佢話自己唔應該有特權喎。

唔係啩，呢班友平時最鍾意貪小便宜，冇理由唔打豬流針先㗎！小白老弟記得內地有人喺垃圾崗做醃菜賣通街，記者問佢哋自己食唔食，佢哋當堂耍手兼擰頭。

據外國數據顯示，好多人喺注射豬流感疫苗之後出現副作用，喺內地、日本以及美國仲有死亡個案添，所以大家喺打針前，記住要同親朋好友見多幾面，食番餐好嘅，抱住革命烈士慷慨就義嘅情懷，拮針成一快！

網友觀點……

Natalie

啲高官自己都唔打，我點敢打呀，都唔知有咩副作用，睇定啲先。

瑤瑤

好似愈嚟愈多人打咗有副作用，都係做多啲運動靠自己好過！

多多

打完又變種咪死，打極都唔完！

Gary

政府淨係叫人打，又冇講清楚有咩副作用，市民咩都唔知就做白老鼠，好冇安全感喎。

網址：www.sunsiupak.blogspot.com

阿豪觀點：周一鑊封後門卸責

豬流感疫苗已運抵本港，孕婦長者等高危人士可優先接種，但弊在外國有啲個案接種咗之後產生嚴重副作用，究竟接種疫苗安唔安全？真係令小市民好擔心。

咁都唔止，當局仲要求市民接種前簽一份「生死狀」。嘩！好得人驚啫吓話？你估家陣玩笨豬跳，又或者係跳傘潛水呢啲高風險運動咩！難怪大家會從陰謀論出發，覺得周一鑊只不過想封定後門玩卸責。

事到如今，如果周一鑊想顯示自己真係將市民健康放喺首位，好應該學教育局高官帶頭驗尿咁，自啪一針。不過睇佢食粒熊仔餅都咁驚，我怕佢即場將支針袋落西裝袋，搞到拮親心口咪仲肉酸！

網友觀點……

馬交人

打又死唔打又死……

步gen云

之前打流感針都唔使簽生死狀，偏偏今次要簽，係咪豬流感疫苗冇咁安全先？

Doriswong

其實簽同意書係想人清楚風險，都合理吖，萬一有人出現副作用，都唔會話院方冇解釋。

匿名

簽生死狀（同意書）係咪真係有用？好多長者都唔識字，簽咗等如冇簽啦！

網址：www.lukchiho.blogspot.com