曾獲選為全球十大知名酒店嘅半島酒店迎來八十一歲大壽，大老闆米高嘉道理爵士食住MINI Cooper熱潮，特別向車廠訂製咗兩部全球獨一無二嘅「The Peninsula MINI Clubman」，用兩部特別版靚車接載半島貴客Shopping，尋日佢仲拖埋盛裝嘅太太Lady Betty Kadoorie剪綵兼開香檳。
「Peninsula MINI」就好似米高嘅Baby，事關佢親自出馬搵寶馬集團高層一齊構思，揀咗屬MINI Cooper S Clubman嘅系列車，車身髹上半島車隊專用嘅墨綠色，車頂可擺放行李箱，後座仲有部迷你雪櫃，麻雀雖小，五臟俱全，難怪米高都第一時間跳上去感受吓。半島車隊家吓已有十五架勞斯萊斯，載客往來機場每程收千二蚊，但「Peninsula MINI」就係免費嘅，只要你畀六千八百蚊租住半島套房一晚，就可以坐車兜風三粒鐘。