政制及內地事務局副局長黃靜文（Adeline）上任冇耐，尋日已經代表政府出席立法會政制事務委員會，就兩項有關人權嘅議程回應議員質詢。佢初試啼聲，畀啲議員明讚暗踩，話佢死背官方指定答案同「石頭鑽唔出血」嘅能力，同局長林瑞麟不相伯仲，夠晒資格做「人肉錄音機」傳人。
面對議員咁樣譏諷，Adeline仍然好淡定，顯然面皮同政策根底都夠晒厚，唔會輕易講錯嘢同發脾氣，似乎好過好多鬧兩嘢就腳軟口窒嘅副局長，政治前途無可限量。
最好笑嘅係委員會主席譚耀宗，佢忽發奇想話如果泛民真係落實五區總辭，政府會唔會派啲副局出嚟參加補選？似乎睇中Adeline咁喎！林公公梗係閂定後門，話Adeline仲要幫佢推銷政改，其他副局亦有好多政策要理。