聖誕將至，好多城中名人都部署外遊，玩具大王蔡志明尋日一家出席新界潮人總會第一屆會董就職典禮時，話佢哋遲啲將會一齊去台灣旅行。蔡太好有心，已經買好聖誕禮物，女兒加怡收到一件Burberry嘅trenchcoat（乾濕褸），細仔加讚就收到Leica M9相機，佢哋都話好開心。
又係嘅，兩份禮物都好有意義，加怡件乾濕褸代表蔡太要為囡囡遮風擋雨，加讚就因為熱愛影相，一直好想買呢部相機。講番尋日嘅就職典禮，首屆會董會由周厚澄做首任主席，林大輝、方平、鄭俊平、莊健成就做副主席。大輝同方平都異口同聲話，呢個組織唔怕同其他潮人會重疊。
尋日到賀嘅潮州商會人士好多，好似長實主席李嘉誠表弟兼永遠名譽會長莊學山、唐學元、陳有慶等都一早到場支持。