立法會決定調查甘乃威好感事件後，有關女事主王麗珠嘅內幕消息近日又再炒熱。曾經協助王麗珠嘅前立法會議員譚香文（Mandy）早排已被質疑借事件出風頭，日前佢又走出嚟實牙實齒咁話女事主過去嘅感情事，有口痕友話，Mandy一再宣揚佢係基於正義而出面，但招數卻係「幫你又跣你」，畀人感覺王麗珠「遇人不淑」，可見「正義朋友」唔係人人頂得住㗎！
早喺甘威涉嫌求愛不遂事件曝光之初，Mandy已經以王麗珠代言人身份，四圍接受傳媒訪問，喺未經王麗珠同意下，證實事件同王麗珠嘅身份，仲大爆部分案情細節，畀人鬧佢借件事增加自己嘅知名度，甚至係為填補落選立會嘅寂寥。Mandy聽到批評後梗係唔認啦，仲話都係為女事主仗義執言，結果搞到畀人下封口令。
事隔一段時間，女事主畀人踢爆曾戀上有婦之消防員、並被勒索後，Mandy接受訪問時又爆響口，仲細緻描述自己參與過啲乜，並加鹽加醋，似乎唔使立法會調查，件事都一清二楚咁。難怪俗語話要帶眼識人，好似王麗珠咁，先被已婚消防員騙情騙財再勒索，再畀前僱主Mandy掟蕉皮跣到一仆一碌，最後仲要捲入甘威嘅好感漩渦，仲有乜好講吖﹖