由香港專業及資深行政人員協會會長容永祺率領嘅名人南極探險團，上個禮拜出發後，途經南非、阿根廷，逗留兩日後再前往阿根廷最南端城市、人稱「地極盡頭」嘅Ushuaia，到埗後就登上南極探險船，今日正式展開南極探險之旅。容永祺尋日跨越大半個地球，電郵咗兩張相畀我哋，真係好難得！
容永祺話，登上探險船之後，佢哋一切食住同大解小解都喺船上搞掂，免得打擾啲企鵝、海獅同海狗。日前抵達Ushuaia時，團員都興奮不已，駿豪集團副主席王英偉、全國人大代表羅范椒芬同夫婿、胡曉明夫婦等團員更喺印有Ushuaia地名嘅牌匾下作「到此一遊」式合照留念。
佢哋雖然個個包到實，但男士穿着鮮黃色羽絨加風褸，女士們則着鮮紅色，一紅一黃相當搶眼，唯獨極地探險家李樂詩着咗件私伙黑色Fleece。