沙田馬場今日會舉行國際馬匹拍賣會，好多馬圈中人都關注呢個年尾盛事，全國政協委員、東海聯合集團主席黃楚標前日下晝已經現身沙田馬場，佢笑笑口咁話入場主要係預覽拍賣馬匹，親自睇吓辦，準備喺今日競投一匹以填補早前退役嘅「青蝠王」空缺。
標哥坐住部過百萬元嘅天皇級座駕豐田Century到埗，架車雖然已出廠九年，但外觀保養得相當簇新，最煞食係掛上「1993」呢個靚車牌，令人眼前一亮。今年二十一匹拍賣馬當中，標哥睇中兩匹紐西蘭兩歲馬，成本價分別約為一百一十萬元同一百七十萬元，他預備用二百至三百萬元競投其中一匹，投得後希望交由練馬師方嘉柏訓練。佢嗰匹退役嘅「青蝠王」過往都係由方嘉柏訓練，總共為佢贏得六百幾萬獎金，所以對方廐深具信心。
佢近年先後買入六匹馬，惟大部分已退役，目前只剩低一匹「東海先鋒」，難怪要補充新血。