本文重點
泛民陣營為咗五區總辭互轟互插，又鬧出黑手醜聞，嗌交、公開爆粗更惹嚟唔少反感。市民眼冤之餘，泛民支持者更加心灰意冷，連帶一年一度元旦遊行都死氣沉沉。據講元旦遊行嘅搞手蔡耀昌等都好頭痛。尋日泛民舉行飯盒會，有人忽然拋出絕橋，倡議同高鐵組織一齊元旦柴娃娃，呢一招等於扯埋反高鐵嘅社運人士撐場兼湊數，費事元旦遊行嘅場面太肉酸啫！
近排五區總辭搞到泛民大分裂，黑手、過氣政客嘅陰招同反擊更無日無之，搞到往年呢個時候已經打鑼打鼓嘅元旦遊行依家仲靜英英，加上幾個政黨又有心病同勾心鬥角，搞到元旦遊行幾難唔陷入低潮。
另一邊廂嘅反高鐵運動卻氣勢如虹，蔡園村村民同反對團體搞遊行有二千幾人基本盤，芭蕉葉、蔬菜等道具又多籮籮，更有激進者佔據政府總部，風頭一時無兩。嚟緊十八號立法會財委會表決高鐵工程嘅撥款，組織放聲要包圍立法會，又一場大龍鳳排緊隊上演。
時機唔啱動員乏力
有人因此心生一計，元旦遊行拉埋反高鐵組織一齊玩，只係呢個如意算盤都打得好肉酸，事關高鐵撥款嘅表決十八號舉行，元旦遊行時，已經過咗十幾日，呢個議題唔係明日黃花，都生米煮成熟飯啦，泛民扯埋佢哋遊行，想話唔係搵人湊數，都好難搵人信啦！或者佢哋又想重施一個遊行、N種訴求嘅故技啩。
講開反高鐵組織，嚟緊十八號立法會就會表決高鐵撥款。據講反高鐵組織有好多構思，警方亦高度關注事件，並做好準備到時可能要出動警員貼身保護支持撥款嘅議員離開立法會，難怪泛民班人對佢哋嘅組織動員能力咁垂涎啦。