太一叮一啲都冇誇張o架。嗱，七十幾歲嘅霍婆婆十月初發現右眼又矇又紅，屯門眼科中心醫生話係白內障，好平常啫，做個簡單手術就搞掂，成功率近乎百分之百。專科醫生打包單，霍婆婆信到十足，既然手術幾乎零風險，梗係做啦。

點知手術刀變咗屠刀，第一次手術已經覺得痛，醫生話佢傷口發炎，要再做手術。冇計，惟有繼續信醫生，都唔掂，要喺屯門醫院做多兩次手術，最後連隻右眼球都要刮走。白內障變失明，雙眼變單眼，公立醫院真係乜都有。

最激氣嘅係，霍婆婆先後搵過眼科中心同屯門醫院，係咪手術出咗問題，但都問唔出個究竟。屯門醫院手術醫生仲離譜，佢話：「唔好再諗番轉頭，係你唔好彩！」咁涼薄嘅話都噏得出，究竟仲係咪救死扶傷嘅醫院嚟㗎？

叮！無喇喇變獨眼，醫生解釋都冇句。協助苦主嘅區議員問得啱：「醫生究竟有無隱瞞手術出錯？咁普通嘅手術都出事，以後邊個敢睇醫生？」霍婆婆左眼亦有白內障，但佢打死都唔敢再入手術室，因為見過鬼怕黑。

有執業眼科醫生話，白內障手術幾乎百分之百成功，手術至多半個鐘。呢單涉嫌醫療失誤嘅手術做成個鐘，非常罕見。病人因發炎連眼球都冇埋，可能同儀器未徹底消毒有關。如果真係咁，類似個案隨時會再發生，院方唔解釋清楚，其實係剝奪咗病人嘅知情權，繼續搵佢哋雙眼較飛。

叮！公立醫院手術失誤，真係花臣多多。左右不分，要切除嘅留喺度，唔使切除嘅又冇咗；做完心臟手術體內多咗截導管，半年後至經大腿主動脈攞番出嚟。至於膝部傷口送紗布，腹腔傷口送金屬圈，眼科手術傷口入面送藥棉，都不過係碎料咋。病人入手術室開刀，就好似去做「生命鬥士」咁款，係人都驚啦！

霍婆婆手術之後一隻眼盲，一隻眼矇，幾乎連街都唔敢出，最遠只能去離屋苑五分鐘路程嘅商場。返內地探吓親友？諗都唔使諗。公立醫院唔止剝奪咗佢嘅知情權，連行動自由都剝奪埋。

更離譜嘅係，霍婆婆做咗幾次手術，冇咗右眼行動不便要買輪椅，已經使咗成萬蚊，屯門醫院一味卸責，點賠償聲都唔聲。佢求助社署，原來要兩隻眼盲晒至有資格申請傷殘津貼。呢個政府點止無能，直頭係超無良！

手術失誤害人不淺，仲夠膽話病人唔好彩，簡直混帳。計太一叮話齋，最唔好彩嘅，係焗住畀食衞局局長周一嶽呢班醫療庸官糟質嘅七百萬香港市民就真。叮！