11/12/2009

播放本新聞相關短片

政情:博客擂台:白車維修斷估

小白觀點:白車「跪於自然」

白車三日唔埋兩日跪低,死因庭裁定三名延誤送院嘅長者之死,係屬於「死於自然」,之但係裁判官加多句,話白車死火會危及生命,仲狂數機電署「維修斷估」,而且「相當業餘」,確係令人費解。如果話遲咗送院同老人家嘅死未必有因果關係,同一道理,咁都唔應該怪機電署㗎,如果我係該署署長,一定學廉署咁囂張,駁嘴駁舌。

事實上,好多公立醫生斷錯症,因乜事死因庭冇插過佢哋「維修斷估」?萬物有情,白車唔行原因有好多,佢哋可能為咗爭取減少工時而集體請病假,點解護士搞變相工潮,有違專業操守,又冇人話佢哋「相當業餘」?所以官老爺係咪應該公道啲,話白車係「跪於自然」至啱。

網友觀點...X)...

[ Thomas ]

白車用來救命㗎,但就成日跪低,係咪靠害。

[ Joey_Chu ]

醫管局又得意喎,又會由得機電署斷估?政府做嘢就係咁求其。

[ 詠文 ]

點會咁判㗎,白車延誤黃金救人幾廿分鐘,梗係失救啦!

[ 茹_kat ]

咁都唔關事,以後使乜call白車呀,佢哋都唔救人!

網址:www.sunsiupak.blogspot.com

阿豪觀點:外判壞車賴邊個

白車耐唔耐就死火跪低,有時病人送到醫院都已經救唔番。負責維修保養嘅機電工程署被死因庭批評只有「業餘水準」、「斷估」,又話消防處應該「換車房」。大家又認為咁樣做能唔能夠治本呢?

坦白講,好多白車都有番咁上下年紀,就算畀出面車房維修都未必能夠確保唔會壞。你知啦,年紀大機器壞,就算有幾多個大國手服侍都係假啦。之但係如果我係機電署員工,就肯定舉腳贊成將白車維修保養工作判畀外面做啦!少一瓣嘢負責,即係少一瓣嘢揹鑊,人工又唔會少咗嘅,印印腳又夠鐘出糧,何樂而不為?不過到時消防處就慘啦,換咗車房啲白車都係咁壞,到時仲可以賴邊個呢?

網友觀點...X)...

[ 安全地帶 ]

唔出奇呀,反正機電署啲人整唔好架白車,都唔會有咩後果㗎啦……

[ 匿名 ]

斷估都得?又唔見你班友出糧可以斷估?

[ 傻仔 ]

好多白車都入得博物館,搵邊間車房整都唔會整得好啦!

[ 龜仙人 ]

應該外判畀出面車房維修,然後炒晒機電署原先整車班友!

網址:www.lukchiho.blogspot.com