11/12/2009

播放本新聞相關短片

政情:陳鎮仁臨場改稿自救

立法會政府帳目委員會前日公審被指管治混亂同浪費公帑嘅生產力促進局,生促局現任主席陳鎮仁喺聆訊時特別向委員派發一份佢喺臨場親筆修改過嘅講稿,同原稿最重要嘅分別就係加咗「我承認生產力促進局在企業管治同項目管理上有粗疏、遺漏及失誤。但我要指出一些背景,我局在過去六年,換了三個總裁,創新科技署亦三年換(了)三個處長」。呢幾句,以示千錯萬錯,都係舊有管理層同政府嘅錯,同我陳鎮仁無關。

獲梁君彥關照 唔敢卸責

再者依家咁多人識得中文輸入法,若陳鎮仁純粹係對下屬準備嘅講稿內容有微言,大可立即叫佢哋喺手提電腦上修改,再整齊咁影印番畀啲委員睇。佢選擇親筆「加料」再「原汁原味」咁派畀班委員,明顯係想畀大家睇到,佢都唔認同管理層唔肯公開認衰嘅做法,希望帳委會最後寫報告時可以放佢一馬。

講真陳鎮仁喺今年七月先接掌生促局,要佢啃晒上手剩落嚟嘅蘇州屎,的確係唔多公道,問題係如果要賴上手嘅,最直接嘅應該卸落做咗六年半生促局主席嘅梁君彥度。點解佢冇咁做呢?咪因為佢之所以做到生促局主席同更重要嘅工業總會主席,或多或少都係得到梁君彥關照,如果咁快就「食碗面、反碗底」,肯定會畀人話衰仔,好難再喺工業界同政界行走。