周日沙田賽馬第八場為國際一級賽事，多匹過江龍來港較勁，盛況空前。新界鄉議局主席劉皇發大仔劉業強有份嘅團體馬「好日子」都會出賽，仲咁啱得咁蹺，愛駒編號第八，仲要排第八檔，三條「八」相當好意頭，可惜對手實在太強，連佢都不敢寄予厚望，只好入馬房餵紅蘿蔔為愛駒打打氣。
劉業強每逢假日好鍾意帶仔女入馬場觀賞賽事，原來佢自八、九歲起已接觸賽馬，但唔係跟發叔，而係跟阿爺學嘢。他憶述，當年阿爺叫佢認住啲騎師：「呢個摩加利，呢個係告東尼呀！」佢話要從小認識賽馬，長大後先會對賽馬感興趣。
接觸馬匹咁多年，佢揀馬都有一手，話除體格良好外，仲要留意性格，有啲馬匹脾氣暴躁同緊張，未必適合香港環境，近年佢較喜歡新西蘭馬，因為比較強壯，襟跑好多。