政府高官唔得民心有辦睇，繼朝早政務司司長唐唐喺中文大學獲頒授榮譽法學博士學位時慘遭網民示威踩場後，尋晚煲呔曾罕有現身香港大球場觀看東亞運動會賽事，佢一入場看台上竟然噓聲四起，捧場反掃觀眾興，煲呔曾嘅負能量可謂無遠弗屆。
話說尋晚東亞運足球項目準決賽由香港決戰北韓，入場人數九千四百人，係各賽事之冠。正當上半場四十四分鐘香港隊率先射入一球時，主席台忽然多咗個煲呔曾，佢入座後主動向看台觀眾揮手示好，結果觀眾完全冇面畀，即時齊心報以噓聲。
但由於當時觀眾情緒高漲，煲呔曾唔知係真聽唔到定係扮傻，竟然將噓聲當歡呼聲，即時跟風同公眾一齊「歡呼」，認真「火羅」爆。佢之後仲自得其樂玩相機，帶埋長鏡頭，除咗影賽事，亦反過來影傳媒，但觀眾同傳媒都專心睇波，少理佢呢個「閒人」。
散場後，陪煲呔曾睇波嘅港協暨奧委會會長霍震霆話，煲呔曾對於球迷以唔同嘅方式為港隊打氣，覺得好有趣。其實煲呔曾火羅爆當有趣就真。