搞事三人組「民主阿婆」陳方安生、「李漢奸」李柱銘同壹傳媒主席肥佬黎一向鼓吹總辭，佢哋為咗力挽狂瀾又有新搞作。民主阿婆尋日發表四點聲明，起首即以泛民共主嘅姿態表示「陳方安生呼籲民主派政黨團結」，話政府喺政改問題上毫無誠意，泛民必須採取積極行動先能夠逼政府交出普選路線圖，力推五區總辭。白鴿黨喺嚟緊嘅星期日決定是否參與總辭，睇嚟阿婆一定係自以為德高望重，向白鴿黨施壓。
阿婆仲會喺下周二同傳媒見面，屆時必定再次硬銷五區總辭。早前喺肥佬黎屋企出席密室飯敍嘅阿婆、李漢奸同李鵬飛，仲會喺下個星期五雲集立法會大樓，同多名立法會議員、政界元老食飯，呢餐飯係立法會定期邀請歷屆前任議員同現任議員嘅聯誼聚會，「三人幫」先後喺唔同年代做過立法會，因而有資格出席。唔知到時「三人幫」會唔會又搞事？
最有趣嘅係同為前議員嘅「華叔」司徒華，之前喺肥佬黎屋企畀三人逼宮支持五區總辭，今次就冇報到名，唔知佢係咪因為費事見到「三人幫」眼冤呢？