甘威事件揭示咗咁多醜陋面孔，擾攘咗咁耐，唔多唔少都影響到立法會嘅形象，但佢仲有「好帶挈」，就係揭露咗立法會申訴制度竟然係「無王管」。

當值議員跟進太「隨意」

立法會秘書處平時收到有關議員喺會議上嘅表現同行為，例如會議出席率偏低、行為不檢等，同埋有關議員辦事處嘅投訴或意見咁，呢啲個案都會由申訴部據當值議員制度集中處理。依家每周有六個議員輪流當值，監察立法會申訴制度嘅運作，仲會向處理個案同投訴嘅申訴部職員作出指示。

但秘書處尋日發出文件，話呢種處理方式比較隨意，有時好難採取跟進行動，為咗令全體議員得知市民針對議員或其辦事處向秘書處作出嘅所有投訴同意見，同埋考慮應唔應該跟進當中所涉及嘅事宜，秘書處計劃喺內聯網設立電子中央紀錄冊，記錄晒相關嘅嘢，等所有議員可以早啲知道投訴嘅內容。

點解秘書處建議搞中央紀錄冊？咪就係多得甘威事件囉！話說當日由幾個當值議員研究投訴甘威事件，佢哋就隨自己意思商討應該點樣處理，最後仲決定交畀內會討論係咪要提出譴責動議，但事前其他議員對相關內容都唔多知情，喺內會仲拗到面紅耳赤。

有見及此，秘書處咪急忙補漏，收緊呢道「隨意門」，搞咗中央紀錄冊後，所有投訴個案都畀全體議員六十對眼到實，若果有啲議員睇到想跟進某啲個案或畀意見都可以早啲出手，唔使等到最後仲懵盛盛唔知發生乜嘢事，咁啲當值議員處理個案冇得再咁「隨意」。