遠嘅唔講，就講今年十月份，有個中年的士司機開工期間急性心臟病發，暈低時誤觸車上機件，令架車急速褪後，同尾隨嘅的士相撞，兩架車都撞爛咗，病發司機送院不治。

當局資料顯示，近五年本港每年有三至十三單交通意外係因為司機突然發病引起，平均每年九單。運輸署分析，逾五成事故涉及司機因素，包括跟車太貼、胡亂轉線、突然轉向、急速煞車等。

發生咗多宗事故，當局唔敢再裝聾扮啞，急急補鑊，運輸署本月起舉辦一連四個月嘅職業司機安全駕駛及健康運動，包括舉辦為期五日免費為職業司機提供健康檢查，仲會舉辦健康講座。當局話喎，咁樣做，係要提升職業司機安全及健康意識，減少開工時猝死及發生交通意外嘅風險。

正所謂「亡羊補牢，未為晚也」，運輸署忽然覺醒，終於肯正視司機病發猝死問題，表面上係件好事，但係大家千祈唔好期望過高。

眾所周知，近年開車時猝死嘅司機，多數因為兩種病，一種係心臟病，另一種係腦充血。而運輸署嘅驗身項目包括體重指數、體內脂肪比例、血壓、膽固醇同血糖等，呢啲項目都無法即時發現心臟病或者腦充血。正如有司機話齋，「驗吓血壓、度吓糖尿，有乜用呀？」

當然，唔排除驗身可以令司機對自己嘅健康狀況有所了解，但係有乜嘢用噃？根據當局嘅安排，健康檢查每日名額五百個，五日加埋只有二千五百名咁大把，而全港的士、小巴、巴士、貨車等職業司機數以萬計，淨係為二千幾人驗身，連零頭都未夠，點可以防範交通意外？咁其他司機點安排呀？係咪分期分批進行？當局連提都冇提。叮！

仲有，當局亦冇講清楚，體檢中如果發現問題點辦，會唔會叫司機停牌？如果冇跟進行動，驗咗等於冇驗。但係如果要有問題嘅司機停牌，咁司機就算知道自己可能有事，都唔敢講真話，唔去做體檢，係人都怕打爛飯碗啦。呢啲問題，運輸署唔知有冇諗過。

一句講到尾，當局煞有介事搞乜嘢職業司機安全駕駛及健康運動，只不過係一場嘥鬼氣嘅體檢騷，根本唔可以解決司機開車時病發猝死嘅問題。所以話呢，大家第日出街，一定要醒醒定定，眼觀六路，耳聽八方，唔係嘅話，一定會撞到一仆一碌。叮！