報咗名採訪東亞運嘅傳媒行家，呢幾日手機不停收到東亞運公司發出嘅採訪安排短訊，同一個訊息收到三、四次，有時朝早九點未瞓醒時收到，夜晚一點瞓緊覺時亦收到，尋日竟然荒謬到喺半小時內收到二十個同款短訊，擾人之極，簡直係噩夢。
呢個短訊嘅內容係提示記者東亞運文化嘉年華今日下晝三點會喺文化中心露天廣場揭幕，由尋晚七點左右開始發出，跟住每分鐘轟炸記者手機一次，更甚者一分鐘幾次，慘過畀債主追數。
根據短訊留低嘅查詢電話打去投訴，接聽嘅係一位康泰旅行社女職員，原來佢都係受害者，事關不停收到投訴。佢解釋今日嘅文化嘉年華係康泰同東亞運公司一齊搞，但康泰冇授權對方大肆宣傳，佢已經打電話畀東亞運公司投訴。再問東亞運公司，回覆指負責發短訊嘅公司出錯喎。到夜晚近十一點，東亞運公司發短訊補鑊道歉，話網絡公司嘅系統已修正。