睇清對方真面目

陳健波後生時喺位於新蒲崗嘅一間銀行分行返工，日日忙到飛起，尤其係每月出糧嗰幾日，當時仲未有乜嘢自動櫃員機，排隊人龍逼爆玻璃，夜晚佢又要去讀書進修考保險牌，完全冇時間識女仔，最後惟有貪就手喺分行入面搵對象，最後成功搵到當時比佢低一級嘅陳太。問佢喺整個過程中有冇試過求愛不遂？係咪喺高級餐廳表白示愛？陳健波就唔肯正面回應，淨係話肯定冇試過利用上司身份，向心儀嘅女下屬施壓抽水。

對於好多人反對辦公室戀愛，陳健波就大唱反調，認為喺同一間公司做嘢，好快就可以知晒對方嘅缺點同真面目，一定唔怕娶錯老婆嫁錯郎。

咁大力支持辦公室戀愛，當然有佢嘅道理，皆因當年佢同太太都係男未婚、女未嫁，但甘威係有婦之夫，仲被踢爆涉嫌求愛不遂炒女助理添，咁又點可以攞嚟一齊講呀！