前證監會非上市投資產品高級經理高秉忠早前自動請纓，話要去立法會研究雷曼事宜小組委員會作供，後來仲透過人權組織公開炮轟小組委員會主席何鍾泰遲遲唔畀佢出席聆訊添！到咗小組委員會話要請佢上嚟，問吓佢想爆乜料之後，高秉忠又冇晒聲氣，好似失咗蹤咁喎！
小組委員會尋日舉行閉門會議，何鍾泰喺會後話，小組喺上月十一號同三十號先後去信畀高秉忠，話小組會傳召佢出席聆訊，但至今都未收到高秉忠嘅回覆。咁點搞好呢？何鍾泰話將會要求高秉忠提供電話同地址等聯絡方法喎。咁若果佢又唔覆，咁咪又係搵唔到佢？
雖然唔知高秉忠幾時先會爆料，但財爺鬍鬚曾就一定走唔甩，鐵定要喺呢個禮拜五出席小組委員會聆訊，而證券及期貨事務監察委員會行政總裁韋奕禮，就將於出年一月再度出席委員會嘅聆訊。