立法會發展事務委員會尋日召開特別會議，由立法會秘書長Pauline吳文華講解新立法會大樓耗資九千九百萬元嘅資訊科技系統。
依家立法會會議只有部分電視台直播，公眾只可以喺會後上網聽番會議內容，但有聲冇畫，非常沉悶。Pauline話新大樓會設立電視製作中心，網上即時直播各個會議，就連翻譯系統亦會數碼化；立法會亦會與時並進，喺網頁加插即時新聞。
嗱！照顧周到，冇甩漏啩！點知資訊科技界議員「IT豪」譚偉豪仲幫門外示威人士諗埋。佢話依家議員要落去接信先知請願內容，所以建議秘書處網上直播示威區情況，而且仲建議設立網上示威區，等唔可以親自前往立法會嘅市民都有渠道表達意見喎。
Pauline聽到IT豪嘅建議，即時點頭讚好，仲承諾會詳細研究添。