旅發局主席田北俊尋日應香港管理專業協會邀請，就保持香港旅遊業競爭優勢發表演說，席間有人問點樣推廣綠色旅遊，佢又表露有嗰句講嗰句嘅直率性格。
話說政府打鑼打鼓咁慶祝爭取到設立國家地質公園，又將地質公園視為新旅遊項目，講到無懼周邊競爭咁，點知田少話地質公園巴士唔去，的士入去又會罰，裏面廁所又冇，買支水嘅地方都冇；如果要加呢啲設備，又會畀當地原居民同環保團體反對，事關當地人唔會鍾意遊客去。
雖然講到啲配備咁差，但田少坦言地質公園一定會放埋落去宣傳工作度，不過「吹水」啲嘢真係吸引唔到幾多遊客。
講到香港酒店唔夠，田少竟然話係遊客都會揀住深圳房租一千蚊以下嘅，依家成日講一程多站，唔好只係睇香港酒店數字，睇埋深圳嘅話，相信已可吸引外地遊客。佢仲好坦白咁話房租六百至八百蚊嘅酒店都仲有空間加房，但去到二、三千蚊嘅就唔係好需要。唔知業界會唔會同意呢？