港隊代表王史提芬喺BMX單車賽勝出，喺專程到場打氣嘅港協暨奧委會會長霍震霆手中，取得港隊同今屆東亞運嘅第一金。據知情人士透露，呢場比賽其實係霍公子精心策劃嘅一場公關騷，睇準外號「BMX天王」嘅王史提芬質素超晒班，所以佢就特別安排呢項賽事作為東亞運嘅第一金，希望可刺激到港人嘅慢熱情緒。
至於煲呔曾日前帶埋愛將財爺鬍鬚曾觀看東亞運壁球女單決賽，亦係霍公子喺背後苦心安排，認定呢個金牌係港隊嘅囊中物，先敢叫煲呔曾嚟捧場同頒獎。最後港隊亦不負所望，決賽兩位選手都係港隊代表，誰勝誰負煲呔曾都可以頒獎畀自己友，唔怕畀人笑佢將自己啲衰氣傳咗畀啲香港運動員。
但民政事務局局長曾德成同政務司司長唐唐就就變咗自己友運動員嘅剋星。前者去睇港隊代表傅家俊嘅男子英式桌球單打八強賽事，點知傅家俊爆冷輸波，但佢之後喺德成局長缺席下，就立即打出應有水準，帶領港隊勇奪男子英式桌球團體賽金牌，真係咪話唔信邪。
同日唐唐亦去捧國家女子籃球隊嘅場，國家隊最後爆冷輸五分。好彩呢場只係初賽，國家隊最後成功入到第二圈，尋日仲喺準決賽遇番日本隊，喺冇特區高官到場打氣下，一雪前恥以兩分之差贏波，決賽會對中華台北。希望到時唔會再有高官突然愛國心大發，仆倒去現場為國女籃吶喊助威啦！