劉慧卿話黎年過往作風低調，建議佢學日前狠批廉署同廉政專員湯顯明處分不公嘅截取通訊及監察事務專員胡國興，要高調啲「新官上任三把火」，話驚住政務官出身嘅佢執行職務時會「勒住勒住」。

大家可能覺得奇怪，點解卿姐要黎年學胡官，而唔係學佢嘅前手「慳家妹」戴婉瑩呢？慳家妹一樣好火㗎噃！之唔係因為黎年曾經做過廉政專員，卿姐擺明係胡官上身，想鬧到黎年好似湯顯明咁頭耷耷。

澄清絕非低調行事

正所謂「過咗海就係神仙」，黎年當然唔會掂呢潭渾水。對於高調、低調呢個問題，黎年一開始就劃清界線，話佢做事講求實際，「唔係做大戲」，亦唔係批評其他人，仲話佢上任以嚟三度搞記者會公布調查報告，傳媒都有大篇幅報道，調查報告亦有增無減，佢更要求公署加強電視宣傳呢啲公眾教育，絕非低調行事。

佢仲強調一定會秉公辦理，反而係佢嘅舊同事問番佢「做乜批評得咁緊要」，又話以佢以前喺政府嘅資歷，「係唔需要同任何人賣帳，因為我夠資深，好多同事都係我（舊）伙記，我唔需要遷就任何一個人」，佢亦話冇任何直系親屬或者「任何『LUNG』到好遠嘅人」喺政府工作，「冇任何包袱亦冇任何嘢會有利益衝突！」

聽佢呢番說話，唔單止覺得佢似喺度恃老賣老，仲不惜「剝光豬」嚟證明自己清白，唔會包庇前下屬。而嗰句秉公辦理，又係咪有啲暗寸湯顯明處分不公呢？

後來卿姐又問點解原先建議將八個法定機構納入申訴署規管，最終只係剩番四個？黎年反擊話係立法會嘅責任，係議員接受政府嘅反建議先剔除其中四個機構，之後又冇開會跟進。

卿姐自知理虧，但仍死撐話專員唔好出番舊時嘅伎倆，有乜事就話係立法會嘅責任，仲話立法會漏招，專員都應該提吓大家開會喎。