小白觀點：第一個捉禮賓府住客

差餉物業估價署突然推出「門牌號數展示運動」，講明會搵人巡查，路牌展示唔清唔楚有可能判監六個月。嘩！醉駕殺人一命坐一年，路牌錯咗等於半條命，有冇再重啲呀老友？一係再狼死啲，逐個街名單字、逐個門牌號碼計吖笨，每個坐半年，咁至有阻嚇作用。

好彩澳門冇學港府咁無良咋，你知啦，佢哋嘅街名水蛇春咁長，如果有人住喺「路義士約翰巴地士打街123號」，寫錯咗做「老耳屎唷漢爸底是打街456號」，咁就有排坐咯。不過全港數以萬計無門牌樓宇當中，最離譜嘅肯定係禮賓府，門牌就咁寫「中環上亞厘畢道」，為咗表示執法嚴明，差餉物業估價署應該第一個捉裏面嗰位住客。

網友觀點...X）...

[　PeterPan　]

就算展示晒路牌，都係唔識睇㗎啦，亂晒嘅！

[　隨便up　]

我就唔信真係逐戶巡查同檢控喇，實走咗去吞泡歎下午茶，都亂咗咁多年，咪又係咁。

[　德　仔　]

應該要執番好晒啦，真係行完成條街都搵唔到地址門牌，仲要嚴格規定格式同放嘅位置，市容都靚啲啦。

[　Gordon　]

哼，咪睇吓拉唔拉到人囉，就算成街冇門牌，最後一定都冇人要坐監。

網址：www.sunsiupak.blogspot.com

阿豪觀點：忽然執正成效唔樂觀

全港數以萬計樓宇冇門牌，有門牌號碼又大小不一、胡亂置放，令人搵路時i晒頭，更可能影響緊急救援服務。家陣差餉物業估價署話會執番正喎，最高可以罰款二千蚊同監禁六個月，你哋又信唔信做得到呢？

好多法律界人士就唔係好樂觀嘞，佢哋話喎，要規管就應該喺立例後嚴格執行，而唔係「懶理」後不時擾民。咦，咁講法，即係可以隨便幫自己住嗰幢大廈搵個好意頭啲嘅門牌喎！而明明隔籬單位係三號，我係四號咪好蝕底？梗係安番個「三三八八」號牌，寓意生生發發啦；至於邊個同你有仇，你就幫佢安個「十三號」邪釘門牌，包保佢仲激氣過畀你搵個八卦鏡照住呀！

網友觀點...X）...

[　高達GT　]

執番正都好嘅，有啲舊區門牌唔清楚，有時真係搵餐死。

[　匿　名　]

點執番正??將個門牌扶番正??

[　姆　明　]

哦！唔怪得之講親街道名同門牌號碼，啲的士司機都唔識去啦！

[　做到冇停手　]

唔覺得有問題吖，你又唔係郵差，又唔係揸白車……

網址：www.lukchiho.blogspot.com