「殊……機密！」

「機甚麼密？一場老夫老妻，還怕醜？」

「小心有人勾線！」

「勾甚麼線？又唔係江洋大盜，又唔係億萬富豪，邊個咁無聊勾線？」

「神探勾錯你條私隱線呀，死佬！收線！」

截取通訊及監察事務專員胡國興提交周年報告，揭發一則奇聞。一名廉署高級主任抄錯目標人物的電話號碼，雖然有另一名高級主任發現錯誤，通知上級竟然不獲理會，繼續以不正確的電話號碼向小組法官提出授權申請，卒之錯誤偷聽一名毫不相干的小市民。

抄錯電話已夠離奇，知錯不改奇上加奇。由此足以說明，香港特別行政區的執法人員視私隱如無物，勾錯線了嗎？沒問題——噢，這對夫婦的對話相當過癮，男方叫女方做傻豬豬，女方叫男方做戇狗狗……咦，有人今晚決定玩滴蠟！

除了廉署，還有警隊，洩露機密接二連三，洩完又洩，洩之不盡。小市民不是有權保障私隱的嗎？對不起，差人叔叔奉旨侵犯人權私隱線。

「老婆，已經安裝反偷聽設備，以後講電話用密碼。」

「乜嘢密碼？」

「如果我講粗口，不要生氣，唔係鬧你。如果我叫你『戇狗狗』，即係有人玩竊聽。如果我大叫『私隱線』，即係有人勾錯線。到時咯喎，向胡官告狀！」