之但係，聽講呢種疫苗有嚴重副作用，早排台灣有兩個孕婦打咗之後，BB胎死腹中，又聽講打咗豬流感針之後有可能癱瘓。唉，咁得人驚，唔打好過打咯，何必攞條命嚟較飛？

衞生署大派定心丸，話豬流感針嘅副作用同季節性流感疫苗差唔多，但係提供嘅保障就高於風險咁話。勢估唔到，佢哋一面硬銷豬流感針，一面制訂類似生死狀嘅同意書，要求市民打針前簽署，確認知道疫苗有副作用。更奇怪嘅係，署方至今唔肯公開同意書嘅內容同式樣，又唔肯回應若果市民唔簽，係咪唔可以注射疫苗。

以前打季節性流感針，都係口頭同意就得嘞，今次因乜嘢事搞到要簽同意書咁大陣仗呀？係咪呢種疫苗有好多大家都唔知嘅副作用？

本來衞生署應該將實際情形講清楚，令大家知道疫苗嘅副作用有幾大，再決定接唔接受。可惜佢哋淨係帶市民遊花園。佢哋話，因為市民對新疫苗認識唔多，所以要簽同意書加深了解咁話。真係九唔搭八。叮！

衞生署鬼鬼祟祟、神神秘秘，令人更加擔心。莫講話普通市民啦，就連醫護人員都信佢哋唔過，依家只有三至五成醫生願意打針。有醫生講到明，唔想攞條命嚟較飛。連醫學會前會長蔡堅都話，依家仲未確定豬流感疫苗嘅副作用及嚴重性，所以佢本人現階段唔考慮打針，「除非食衞局局長周一嶽同副局長梁卓偉都打針啦」。

有醫生懷疑，衞生署明知疫苗有嚴重副作用，所以先要注射者簽同意書，日後冇得追究。真係一針見血，班高官就係想卸責。嗱，流感針我買咗返嚟嘞，打唔打係你哋嘅事，出咗事唔好搵我。

叮佢個鎯鎯，諗番轉頭，成件事都幾荒謬，年初第一波豬流感爆發後，周一嶽同衞生署署長林秉恩等人就話要訂購疫苗為市民注射，但只係大隻講，直到上月仲喺度投標，後來終於買到疫苗嘞，但又搞咁多花臣，令市民唔敢打針，等於將大拿拿幾億元公帑掟咗落鹹水海。

一句講到尾，呢班庸官根本唔係為市民嘅健康着想，佢哋只係諗住點樣卸鑊，保住自己頂烏紗帽，話之你有冇副作用。

之不過，豬流感病毒係唔會同佢哋客氣嘅，有傳染病專科醫生估計，本港可能會有一百幾十萬人中招，死亡人數亦會勁增。衞生署若果仲係懶懶閒，到時睇佢哋點同市民交代。叮！