本文重點
由富豪後代牽頭嘅「博鰲青年論壇」尋日喺會展揭幕，口才了得嘅國家前外長李肇星打頭陣發言。李肇星祖籍山東，佢嘅普通話帶濃濃北方口音，講嘢時口入面好似含住粒乒乓波咁，台下唔少嘉賓聽到頭都痕，恨不得有部即時傳譯機喺身邊，好彩李肇星談笑風生，聽得明幾成內容已不枉此行。久未遊港嘅李肇星對港人笑容印象深刻，話喺港人臉上絲毫睇唔到金融海嘯嘅痕迹。
喺午餐會上，論壇籌委會主席霍啟剛同菁英會核心施榮忻等向李肇星同博鰲亞洲論壇秘書長龍永圖敬酒，又圍住李肇星合照，李肇星扒兩啖飯就去應酬「粉絲」。
鄧亞萍自嘲個子矮
大會以「金融危機下的中國外交、經濟和文化」為題，另一位發言嘉賓城大校長郭位就一針見血咁批評東方人文化教條太多，但做得少；而現代人每每將自己放得高高在上，唔識尊重別人，呢番話認真發人深省。
奧運乒乓球金牌得主鄧亞萍發言時就以身材問題作開場白，自嘲身形矮小，每次上台講嘢都驚個咪擺得太高，估唔到尋日大會連呢點都就晒佢，連佢都忍唔住讚句：「香港人做事真係夠晒專業！」