出名講得笑嘅台中市市長胡志強尋日應城大邀請，同大家分享幽默之道。佢話做人識幽默好重要，一嚟可以化解尷尬情景，有時仲可以將幽默化為利器，同對手針鋒相對。而喺香港班高官當中，佢話政制及內地事務局局長「林公公」林瑞麟最幽默，仲自爆林公公私底下好識講笑添！
胡市長真係慧眼識英雄，一眼就睇得出林公公嘅幽默感，但佢可能唔知，除私底下傾偈外，林公公其實幾時都咁識講笑。就好似最近政改諮詢當中，功能組別嘅存廢問題炒到㷫合合，但無論記者或議員點問都好，佢都可以帶大家遊足五分鐘花園，仲可以連功能組別四個字都冇提過，可見佢講冷笑話嘅功力無人能及。
咁點做一個出色嘅政治人物呢？胡市長話要唔介意畀人知道自己嘅弱點之餘，亦要唔怕畀人攞嚟講笑。大家睇到林公公咁刻意分享自己係人肉錄音機，繼而完全唔怕人哋話佢，繼續發揮錄音機本色，咁佢梗係最幽默嘅人啦！