眾所周知，旅遊發展局主席田北俊係愛車之人，名下有唔少靚車，但尋日佢竟然大呻，話近排想為公司換部新車都換唔到。
根據田少嘅經驗，每年年尾車行都可能有平貨賣，所以前排佢特登去車行
，諗住親自幫公司揀番部好車，點知車行冇貨可賣，田少變咗食白果，失望而回。查明原因，原來係今年經濟唔好，所以車行唔敢入太多貨，所以就冇尾貨賣嘞！
車行方面仲話，最快要到出年三、四月先至有新貨源，睇怕田少過多幾個月，要去車行多轉咯！之不過，車行話明係新貨源，自然唔係平貨，若果冇平貨執，到時田少又會唔會忍手呢？
田少前排大鬧政府冇為旅發局預留東亞運門票，令旅發局喺推廣時倍添困難，其實佢亦係東亞運嘅捧場客，仲一心諗住自掏腰包買飛入場睇排球，同時為鍾意睇跳水嘅太太撲飛，可惜呢兩項熱門賽事嘅門票早已售罄，再度令田少失望。好彩幫田少做投資嘅公司手上有飛，仲主動聯絡田少睇吓佢有冇興趣，咁仲唔係執到寶？算補番數啦！