短片共分為三個小段，首段描述一對阿叔同阿嬸喺茶餐廳歎茶吹水，阿叔話「民生福利好啲，我哋就受惠多啲喇」，阿嬸就回應話「不過要應使則使喎」，此時坐喺阿叔後面位嘅鬍鬚曾突然擰轉頭望住兩人傻笑，嚇到佢哋差啲倒瀉奶茶。鬍鬚曾似係喺度非法截聽喎！鬍鬚曾仲搞到自己無處不在咁，無論學生玩緊西洋劍擊又好、文員喺辦公室影印緊又好，佢哋一講對預算案嘅意見，鬍鬚曾都會忽然間好似攝青鬼咁攝出嚟，表示佢會聽大家嘅意見，片中嘅學生同文員，都畀佢嚇咗一跳。呢次就似秘密監察，令香港變成「警察國家」。

截取通訊及監察事務專員胡國興尋日慶到爆咁鬧啲違規勾線嘅行徑，咁我哋係咪都要向胡官舉報，查吓鬍鬚曾係咪喺度非法截聽呢？