長期負責青年工作嘅國務委員劉延東日前旋風式訪港，期間會見上百名香港青年團體嘅新舊領導。雖然佢喺講話以至成個訪港行程中，一句都冇提過政制問題，但係人都知要表現愛國愛港，最直接方法就係瞓身力撐政府嘅政改方案。

登千字文撐政改

其實菁英會早喺劉延東訪港前兩日，已率先喺報章刊登咗篇上千字嘅聲明，指雖然佢哋對政府嘅政改方案都有唔少意見，例如質疑冇喺特首選委會增設青年團體同中小企界別、增加五個立法會區議會功能議席可能會令立會地區化等，但整體而言方案都提高咗民主成分，有利香港循序漸進喺二○一七同二○二○年落實雙普選，希望泛民主派就政改內容作出理性討論，避免政制原地踏步。

唔單止咁，菁英會副主席兼政治研究會主席白富鴻尋日就話，佢哋將會進行民調，了解唔同背景青年人對政改嘅睇法，又強調佢哋個個都有獨立思維，唔會盲目支持政府，而係以類似智囊嘅角色為政府出謀獻策。

咁多動作，睇嚟佢哋想幫自己同其他富豪二代洗脫「二世祖」嘅污名噃。