本文重點
香港搞電子書慢三拍，落後其他國家好多。教育局副局長陳維安孭飛搞嘅電子書計劃，拖咗年幾至十月下旬，由佢做主席嘅「課本及電子學習資源發展」專責小組先拋出十五項建議，當中只有六項比較實質，餘下嗰九項建議可以擺埋一邊唔使理。
至弊嘅係呢啲建議唔湯唔水，仲招招衝住出版商而嚟，辣㷫晒校長、教師同出版商，再加上推行電子書一直都冇具體細節，陳維安連減唔減到印刷教科書嘅價格都答唔到，有違原意，令教育界罵聲四起。
後知後覺 倒行逆施
陳維安尋日喺《局長人語》撰文，有意無意咁話要成功開發電子學習模式同資源，仲需要教育界、出版商同資訊科技界共同合作嘅。字裏行間，佢似乎喺度補鑊，要氹番班業界。
跟住陳維安仲話喺下年一月會同佢哋一齊去英國考察，同海外教育界、出版商同資訊科技界交流，包括出席學習同科技論壇、參觀學校同喺當地舉行電子學習研討會。
咁就奇怪嘞！專責小組建議以一筆過撥款畀啲學校搞試驗計劃，啲校長鬧到飛起，批評政府眼高手低，每間學校得嗰四萬蚊，連電子白板都買唔起，專責小組竟然唔係先去外國參考經驗後再去制訂建議，反而係建議出晒街先話帶隊去考察，好後知後覺啫！
陳維安仲話會盡快喺香港教育城設立一個網誌，亦會喺facebook開設群組，藉此吸引家長、教師同學生發表意見，共同構思切合本港實際情況嘅電子學習方案添！
政府要制訂政策，乜唔係先要參考外國經驗，跟住再搜集同吸納民意，然後先訂出建議嘅咩？睇陳維安所做嘅嘢，全部好似倒轉行咁，亂晒程序喎，點樣叫人有信心電子書可以搞得好呀？
尤其佢話教育局出年首季會獲立法會財委會批准撥款，喺下學年推行電子學習嘅試驗計劃，依家先做咁多嘢，似係臨急抱佛腳多啲噃！