小白觀點:煲呔曾潛水減污染
政府成日宣傳叫市民「為藍天打氣」,唔知點解個天依然咁灰,原來天下間係冇免費午餐嘅,打氣唔係唔得,不過係要小市民畀錢埋單咁話啫!查實環境局局長邱騰華曾事先張揚,話要環保,就要預咗呢樣加、嗰樣加,如果唔想畀錢,學乜人講環保吖。
話時話,特府高官喺環保工作上一直不遺餘力,好似煲呔曾咁,佢自己知自己事,兩文三語唔太掂,又周不時開口夾着脷,於是潛水唔蒲頭,成功減少咗好多聲音污染。仲有呀,當局加開咁多個副局長、政治助理,證明政治環保回收業已經上咗軌道。所以大家應該同高官同心同德,唔好要求咁高喇,灰天當藍天,收貨啦。
網友觀點......
周星星
抗議加電費!樣樣都計落升斗市民條數度,咁我哋同邊個計呀?
BOMB
兩電有盈餘仲加價,冇天理呀!一於抗議到底!
史提芬
成日話環保環保,香港幾時有過藍天吖?只係搵機會借環保營商就真。
Frank
加價我就上街抗議!經濟已經差,仲加價,真係想逼死小市民咩!
網址:www.sunsiupak.blogspot.com
阿豪觀點:市民立喺必敗之地
聽講兩電以增加更環保嘅天然氣發電令成本大幅上漲為由,正申請緊加價,好可能下年元旦就實行。咁即係話,一係就捱污濁空氣,一係就捱貴電費,總之市民就立喺必敗之地啦!
好嘞,我當你成本上漲要加電費勉強講得通,咁之前煲呔曾提出嗰個慳電膽現金券計劃,理論上落實後市民用電少咗,應該更環保至啱o架,咁點解電力公司又話要加電費呢?如果咁講,咪即係市民環保都要受罰?人哋澳門都向用水量減少一成嘅住宅用戶回贈水費啦,點解香港電力公司唔學吓人哋,鼓勵香港人慳電呢?
成本上漲要加,收益少咗又要加,真係想問佢,到底咩情況先有得減呢?
網友觀點......
藍勤
好明顯,市民將會又捱貴電費,又捱灰天!不如再畀多啲電費,買部空氣清新機!
妹頭B
點解政府做咗咁多環保措施後,空氣仲係咁差?啲錢用咗去邊?
傻仔
好奇怪,市民用少啲電,本來係環保啲,但係電力公司又要保證利潤,要加電費,咁即係點?
匿名
一句成本上漲,就即時要加電費,最好即時生效,之前要求減電費,又唔見佢咁快手?
網址:www.lukchiho.blogspot.com