記唔記得早排曾蔭權上電台為施政報告解畫，有專業人士打電話投訴，話樓價貴過頭，買唔起港島樓，搞到年輕醫生同律師冇法子拉埋天窗吖？煲呔曾即時彈條好橋：住唔起港島，可以住新界㗎嘛。

唔係齋噏o架，呢嗱，發展局高官前日話，包括古洞、粉嶺北同埋坪輋嘅新界東北發展計劃入面，公私營房屋比例係四十一比五十九，私人樓宇大約佔六成。當局會小心處理公共設施同興建時間，避免因為公屋太集中，配套設施同就業機會不足，重蹈天水圍覆轍喎。

按港府嘅規劃，第日呢個新發展區除咗公屋同私家樓，仲有低密度私人住宅添，而且商場同戲院都好有規模㗎，居民使乜下下出油尖旺，甚至過海去中環吖。咦，差啲漏咗添，嗰區日後除咗有舖頭吸引內地同胞過嚟飲杯茶、食個包之外，仲會發展高增值同無污染行業，提供四萬幾個就業機會，直頭係「幸福家園樂歡欣」咯。

咪住！起埋咁多私家樓，搵邊個買、邊個嚟住先？一個成功社區，除咗完善嘅配套設施、方便快捷嘅交通，仲離唔開可以自給自足呢個必要條件，講白啲即係大部分居民都唔使山長水遠跨區搵食。

喺新界東北區發展新市鎮，莫講話港府做嘢一向議而不決，有頭威冇尾陣，高增值同無污染行業有排都唔見影，就算真係搞出嚟，有幾多工啱中產做？再講，新發展區二○一四年至動工，啲樓起好之後，交通配套設施好似古洞鐵路站等，未必能同期啟用，到時又有幾多中產願意搬入去？

叮！唔該發展局局長林鄭月娥諗清諗楚，如果吸引唔到中產搬入新發展區，就算發展商肯起，啲樓都冇人肯買，私家樓比例高過公屋又有乜意義？到頭來公屋居民實際上又係佔大多數，咁同公屋居民佔咗八成嘅天水圍又有乜區別？

港府所謂新規劃擺明係玩數字遊戲，諗住連呃帶氹要市民入去做開荒牛。話時話，當局呢招等同將發展新社區嘅責任推晒畀私人發展商。規劃失當，低下階層住屋問題長期得唔到解決，依家仲想拉埋中產落水，直頭搵笨兼靠害啦。

叮佢個鎯鎯！如果港府繼續卸責，唔做好完善規劃就亂咁嚟，呢區只會有人因為負擔唔起每日幾十蚊嘅交通費而唔肯返工；因為社區設施唔夠，睇病要跨區入院，球場人龍長過街市嘅「奇景」隨時會出現；中產居民又會質疑點解區內連似樣嘅學校都冇，咁仲唔係新界東北版嘅「悲情城市」？