有「新界王」之稱嘅鄉議局主席劉皇發，今年大年初二首次以行政會議成員身份為香港求籤，立即獲車公顯靈贈佢一支下籤，預示香港喺未來一年「內有家鬼、家宅不吉」，又暗示班政府高官全部都係「鬼卒」同「妖怪」，結論係「禍來禍去皆自招」。結果煲呔曾政府果然喺年內接連爆出慳電膽益親家同雷曼迷債益弟婦等醜聞，民望一度跌至「不受歡迎」水平，證明發叔喺求神問卜方面真係有啲料。
發叔尋日再次出手，但今次就唔係去車公廟求籤，而係帶領一眾鄉議局高層同鄉民善信，為船灣岐山三宮廟主持拜神同開光儀式。究竟今次為香港市民祈咗乜嘢福呢？發叔致詞時透露，除祈求香港社會和諧、市民生活風調雨順外，仲特別提到希望政府為老百姓多做好事、多行仁政。咁即係話，政府冇做好事，亦行不仁之政啦，發叔作為行會成員，祈福嘅內容都算可圈可點。
發叔講完呢番話唔夠幾分鐘，由主辦單位臨時搭建嘅禮台地基，好似地陷咁成個向後冧咗一下，發叔同鄉議局副主席張學明立即彈咗起身避過一劫，其他嘉賓就要用手掹住張櫈仔，先唔使四腳朝天大出洋相。
呢次小意外唔知係咪三聖顯靈，藉此話畀大家聽煲呔曾政府都係無藥可救、遲早陸沉呢？