劉延東讚揚饒老對中華文化貢獻良多。所謂「南饒北季」，北京嘅學術泰斗有今年逝世嘅季羡林，南方就以今年九十三歲嘅饒宗頤做代表，劉延東仲話饒老好似大熊貓添！唔好誤會，唔係指饒老有黑眼圈，而係形容饒老同大熊貓一樣，都係國寶嚟㗎。

其實，尋日朝早九點未到，成班「大孖沙」輪流扺達紅磡海逸酒店同劉延東見面，分別有「超人」李嘉誠同「小超」李澤鉅、新地郭老太同兒子炳江同炳聯、「四叔」李兆基、「彤叔」鄭裕彤同兒子鄭家純。之後，佢外出參觀港大返嚟，下晝三點又同十間高等學院嘅校長見面，然後再去會展，會見香港青年團體代表同出席○九年博鰲青年論壇，呼籲香港青年愛國愛港，集中精力發展經濟，稱正在制訂嘅十二五規劃，會研究香港同澳門喺國家改革中嘅功能定位同機制，希望港澳把握機遇咁話，真係忙到冇得抖呀！