有人話如果甘威因事件被迫辭職，白鴿黨冇可能唔派人參加補選保住喺港島區唯一嘅席位，變相逼該黨參與五區總辭；亦有分析認為該黨忙於應付甘威事件，更可理直氣壯咁唔參與總辭，其餘泛民黨派基於實際勝負，可能考慮放棄總辭。

但喺短期嚟講，甘威事件肯定會阻到有關總辭嘅辯論。點解？社民連議員黃毓民喺嚟緊禮拜三嘅立法會動議辯論五區總辭，但富貴黨劉健儀提出嘅譴責甘威動議同旅遊界謝偉俊提出嘅撤銷調查動議，都安排咗喺毓民嘅動議前進行辯論同表決。有關動議原先已估計會有唔少議員發言，依家多咗王麗珠份聲明，肯定會有更多人想講嘢。

立法會秘書處日前就通知議員，話甘威嗰兩項動議估計要傾六至八粒鐘，加埋其他議程，嗰日九成九傾唔晒，叫大家做好心理準備禮拜四要續會。五區總辭動議排喺議程最尾，分分鐘禮拜四下晝先傾得完，畀個「柑」阻遲咗一日。