07/12/2009

播放本新聞相關短片

政情:鬍鬚曾嘥公帑又搞形象工程

財爺鬍鬚曾舊年以預算案諮詢為名,製作大批由佢做主角嘅電視宣傳片、電台宣傳聲帶,仲有話搞搞新意思嘅漫畫,合共花咗接近七十四萬元公帑製作,但份預算案嘅評價竟係歷來最差,被抨派糖炒冷飯,加碼派糖又亂派,既無助中產,「五無人士」更加乜都分唔到。

當時好多立法會議員炮轟有關宣傳手法係「洗腦」同浪費公帑,事關收集到嘅意見都畀鬍鬚曾揼晒落海,質疑短片唔係宣傳預算案,而係為佢度身訂造嘅個人宣傳。

尋日佢喺個人網誌預告新一份預算案喺出年二月二十四號公布,未來呢幾個禮拜會做諮詢工作,仲預告今日會有新一輯嘅宣傳短片出街。短片內容,佢話要賣關子,只肯透露短片花咗一日時間拍攝,當中有三個場景,其中一個仲係佢最耍家嘅洋劍Look,睇怕係要話畀人知佢通完波仔後身體冇晒事。咁擺明又係花公帑做形象工程啦!

拍宣傳片NG幾十次

呢段短片長三十秒,但鬍鬚曾話由於導演要求好高,所以佢NG咗不下幾十次,跟住扮無知咁話以前有啲粵語片可以「七日鮮」,即係七日內做好拍攝、剪接、配音同配樂,仲自嘲若果以佢哋嘅進度,拍攝一齣兩個鐘嘅電影起碼要拍一年。查實佢NG咗咁多次,已經拖長咗製作時間,又唔知要嘥多幾多錢呢?

最差嘅係,事隔大半年,佢竟然翻舊帳,話有啲評論批評呢種諮詢係政治化妝,只會令市民產生「假希望」,諮詢工作多此一舉,佢對呢啲講法完全唔同意,仲承諾會詳細考慮社會各階層畀佢嘅每一項意見、電郵同意見書喎!

其實,佢咁講都係硬撐要拍宣傳片啫!佢仲叫啲市民睇完段短片後,畀多啲意見佢,又話無任歡迎,但點解佢懶理班議員鬧鑊勁,再重蹈覆轍,嘥錢做個人宣傳呢?咁係咪自打嘴巴呢?