小白觀點：手車咁屎影衰警隊
三名當值交通警懷疑約埋一齊鍊車，點知其中一架炒車，搞到鐵騎巡警損手爛腳，傷勢仲唔輕添，警方高層好應該立案深入調查，搵出件事嘅真相。大家唔好會錯意喎，佢哋當然唔係查吓有冇人違規越區片車啦，而係查點解前線交警手車咁屎，影衰晒警隊就真。
冇錯，雖然喺香港醉駕殺人唔會被重判，但照計警察冇理由知法犯法扶醉執法，小白老弟認為理由只有一個，就係嗰位交警好似老虎活士咁，以為老婆喺後面追打佢，驚起上嚟一個唔留神炒落地。好彩香港警隊冇學意大利警方咁，引入林寶堅尼系做警車，如果唔係，警方再搵多多人肉路障去堵截自己友都唔得掂。
網友觀點...X）...
[ 阿倫 ]
哈！咁又係喎，咁屎點同飛車黨鍊呀，炒先過人哋。
[ Jordan ]
連交警都周街飛車，唔怪得夜半飛車黨都咁大膽啦，佢哋飛死佢嘅事，唔好累街坊。
[ 貓咪提到 ]
以身作則，簡直要頒番個最英勇獎畀佢哋……
[ 小魚兒 ]
大吉利是講句，如果炒車死咗，入唔入到浩園呢唔知？
網址：www.sunsiupak.blogspot.com
阿豪觀點：轉揸白車救急扶危
三名當值交通警懷疑約埋一齊鍊車，其中一架仲炒埋，鐵騎巡警受重傷。吓？乜咁都得？睇嚟呢三個掛住鍊車嘅交警，應該轉去揸白車，咁咪可以早啲到達現場囉；又或者索性轉行做賽車手，代表本港出戰澳門。
揸鐵馬嘅交通警鍾意鍊車，點知第時有冇其他警員鍾意射擊，得閒無事比併槍法準唔準㗎？依家諗番轉頭，其實拍拖必警員已算好好㗎喇，起碼唔會累街坊吖！
呢個時候，「FOXY天王」應該再度出場為民請命，佢一次過可以摷到百幾份警方機密文件，唔知可唔可以搵到交通警下一次舉辦「賽車」嘅路線同時間等詳情呢？等小市民可以避開嘛！
網友觀點...X）...
[ 我要當差 ]
唔知仲以為拍緊《警察故事3之知法犯法》添！
[ 豬標精 ]
今日就鍊車啫，聽日比試槍法，咁小市民咪大鑊？
[ 尖子 ]
交通警應該接受駕駛態度訓練。
[ 匿名 ]
就嚟要好似小巴咁樣，安裝車速顯示器同埋車速鎖！
發表方法
讀者如對本欄每日話題有任何意見，歡迎登入網址發表意見。本報保留採用刊登權利，不另作通知，敬請留意。
明日主題
為藍天加電費
網址：www.lukchiho.blogspot.com