今年一月廿三日，落馬洲發生六人死亡嘅嚴重車禍。涉及醉酒駕駛嘅貨車司機承認六項誤殺罪，尋日喺高等法院被判監六年及吊銷駕駛執照，出獄後可重新考牌。

恐怖車禍奪走六條人命，被告酒精測試嚴重超標，咁嘅醉駕罪行只係判坐六年監，死者家屬條氣梗係唔順啦。有人直指法庭判得太輕，對家屬唔公平，唔排除會上訴。亦有死者家屬批評，六年刑期等同一條人命只判一年，向公眾傳達一個不良訊息，飲醉酒撞死人亦唔使重判。

法官喺庭上話，判刑亦唔會令死者復生，呢類案件量刑唔容易。講真，悲劇唔想發生都發生咗，對肇事司機判再重嘅刑罰，亦唔可能彌補死者家屬失去親人嘅傷痛，更唔可能改變六個家庭破碎嘅現實。

家屬冇辦法接受法庭輕判係人之常情，完全可以理解。但係，避免悲劇重演，加重刑罰、嚴格執法杜絕危險駕駛，政府責無旁貸。如果再唔吸取教訓，仲好似以前咁，對醉酒駕駛刑罰過於寬鬆，車禍受害人真係死都唔得眼閉咯。

呢嗱，尋日就有死者家屬狂炳曾蔭權，話佢雖然喺車禍發生當日到過現場視察，但未有真正為死者家屬提供協助。當日曾向煲呔曾下跪同要求加強醉駕刑罰嘅死者家屬早前亦批評，當局到依家仲未對肇事者實施終身釘牌以示嚴懲，令呢啲人出獄之後仲有機會犯案，咁做完全唔公道。

叮！治亂世用重典，如果打擊醉酒駕駛唔落重手，根本起唔到阻嚇作用。就算法例寫得再嚴，如果法庭判刑下下鬆手，無良司機一樣隊完幾支酒再揸車。呢嗱，警方今年二月初開始執行隨機酒精呼氣測試打擊酒後駕駛，但大把醉貓司機目無法紀，繼續橫衝直撞，原來事出有因。

新例實施之後四個月就有四十八人斷正，雖然首次有司機冇發生意外但違反酒後駕駛法例被判監禁，但都係緩刑，唔使踎監，更多嘅只係停牌三個月、罰款幾千蚊算數。處罰輕到離晒譜，對有心違例嘅司機又點會有阻嚇作用吖。

講開又講，發生奪命車禍，肇事司機固然要嚴懲，但政府喺改善道路安全設施、消除隱患、加強交通安全意識教育、端正司機駕駛態度，尤其係從嚴執法呢幾方面，根本就冇交足功課，同樣難辭其咎。

改善交通安全，港府一係該做嘅唔做，一係做一半唔做一半，十足醉貓揸車咁，完全亂晒龍，你話市民出街有乜辦法唔一步一驚心吖。叮！