小白觀點：大財唔出小財唔入

依家香港嘅學生真係幸福嘞，校舍造價竟然要十二億元，簡直就係豪宅級數！你睇吓最牛嘅希望小學，樓高三層，要求好簡單，甩皮甩骨、天花有個大窿都唔係大問題，只要唔冧就得，造價都只不過係幾十萬之嘛！小白老弟真係好想去參觀吓個超豪校園，睇睇啲黑板同廁所係咪鑲金。

但話分兩頭，有時呢啲錢唔使唔得，正所謂小財唔出……Sorry……應該係大財唔出，小財唔入至啱。政府家陣高調搞教育優勢產業，如果唔豪裝，點吸引嬌生慣養嘅富二代嚟讀書呀？免得人哋乜領導、乜總嘅心肝寶貝打電話返去喊住話：「我受不了呀，這裏的課室比家中傭人住的還小呀！」

網友觀點......

Ming88

真係睇唔過眼，用十二億公帑起學校，鑲金嘅咩，讀完曉飛乎？

brother

聽講話會起離地最高嘅中空電梯，覺得好扮嘢囉，冇用，嘥錢。

信義

唔通起豪啲，學校知名度就高啲？係愚昧嘅人至信。

Patrick L

花十二億元竟然係用喺個外殼度，放落教育資源好過啦，呢個政府不切實際，市民真係慘。

網址：www.sunsiupak.blogspot.com

阿豪觀點：「德政」值得大力鼓吹

東亞運就嚟開幕，到依家都甩甩漏漏，連電腦都唔夠用，可能係使得太少錢啩！睇吓人哋職訓局喺調景嶺起嘅兩幢新校舍啦，使咗成十二億㗎，夠搞三次東亞運有突。唔好咁獨食好喎，一於開放畀遊客參觀啦！

十二億起間學校，大家都話唔抵，之但係相比起其他公營機構洗腳唔抹腳嚟講，都勉強可以講有一個「好處」，就係普通人家嘅子弟都有機會入讀，而鄧爾邦坐商務客位環遊世界「公幹」、入住大使級酒店套房，我哋唔會有份享受喎！

所以呢，起超豪校園呢項「德政」絕對值得大力鼓吹，最好十八區都起「超豪泳池」、「超豪體育館」，等小市民都沾吓光歎番吓嘛！

網友觀點......

無處人

嘩，唔係啩，起間學校要成十二億？入面啲門窗鑲金㗎？

Kitty貓

用咁多錢起一間學校，點解唔考慮吓用呢啲錢嚟資助貧窮小朋友書簿費呀？

無厘頭

係咪用愈多錢起間學校，啲學生愈叻先？係咁嘅話莫講十二億，一百二十億我都制呀！

譚耀文

但係點解呢啲亂使錢個案，次次都係使完之後報紙先至報道呢？點解冇人一早阻止佢哋？

網址：www.lukchiho.blogspot.com