工聯會消息人士話嫻姐舊年喺九龍東排第二，一心急流勇退，如果五區總辭早一年發生，相信八人大轎都抬唔郁佢出戰，但可能個天都想玩泛民，嫻姐呢一年嚟健康指數拾級而上，加上佢有鋪辛苦癮，唔做唔舒服，工聯會評估若泛民真係五區總辭，嫻姐實會回歸。

消息又話工聯會亦評估過嫻姐嘅贏面高達九成。純粹數票，喺九龍東泛民嘅總票數確稍高於親中陣營，但補選一般投票率較低，不利泛民，加上泛民鬼打鬼，白鴿黨唔撐公文袋袋巾傑，喺咁嘅形勢下，只喺中產屋苑有優勢嘅袋巾傑，個議席凍過冰水啦。

袋巾傑焗闖鬼門關

最抵死嘅係，工聯會認定袋巾傑明知送死都要焗闖鬼門關。點解？舊年九龍東混戰，社民連陶君行得到一萬六千票，如果袋巾傑呢鋪唔敢玩，道德高地就會畀陶君行霸佔，二○一二年立法會選舉隨時輸畀陶君行，但袋巾傑輸畀嫻姐，非戰之罪，一二年仲有翻身機會，若然下屆輸畀陶君行，就永不超生，所以袋巾傑今次係啞子食黃連，而嫻姐就係眾望所歸，冇得唔回歸。