話說陳維安尋日出席一個教育研討會時話，佢大仔讀嗰間國際學校今年慶祝四十周年校慶，讀緊中一嘅大仔竟然喺教育局嘅網頁，發現間學校喺一九七○年註冊，計盡都係得三十九周年。大仔仲多番同佢講呢個問題，希望佢同校長反映，但佢都冇理到。

囝囝深深不忿，決定直接走去同校長講清楚。校長翻查文件，至發現原來當年學校註冊需時一年，所以教育局方面嘅資料的確係遲咗一年，至搞出呢個誤會。被學生挑戰嘅校長，不但冇嬲，反而非常欣賞呢位學生唔盲目相信他人，有求知嘅精神，仲特登喺校報上表揚佢添。

點解無端端講個仔呢？原來呢件事令佢明白到年輕人有獨立思考，所以喺驗毒呢單嘢上，佢會更加尊重年輕人唔同嘅聲音咁話。但聽落去都係覺得佢似兜個圈讚囝囝多啲喎！