04/12/2009

播放本新聞相關短片

政情:商界三重炮 輪流炮打泛民

泛民主派策動五區總辭愈鬧愈亂,炒作無日無之,而一直沉默嘅親中陣營,最近終於展開反擊戰,繼工聯會組聯盟打民意戰抗衡泛民外,親中三名商界重炮手,包括合和實業主席「哥頓」胡應湘、恒隆地產主席陳啟宗同全國政協常委陳永棋,一連三日輪流發炮,炮打民主派,時間真係咁巧合?

哥頓、陳啟宗同棋哥有頗多共通點,除咗身形相似之外,佢哋都係政壇火藥桶,對泛民一向極力鞭撻,言論火爆至極,經典語錄多不勝數,好似哥頓鬧泛民係「暴民政治」、陳啟宗指香港係全中國最共產嘅地區、棋哥批評立法會權力無限自我膨脹等,都係對準泛民嚟打,佢哋三個逐漸成為親中陣營炮轟泛民嘅重炮手。

政改諮詢會前發難

最近呢三位重炮手不約而同出招,唔似巧合,反而似係暗中聯手出擊多啲。首先由哥頓點火藥引,批評泛民策動五區總辭,係玩馬騮戲,仲話馬騮戲有好多種,有打觔斗、有唔打觔斗,即係鬧泛民似小丑;第二日,陳啟宗接力,佢講嘢學術性較高,批評總辭係「小政治」,「小政治」呢個詞可能連被鬧嘅泛民主派議員都未必明點解,唔緊要,唔明鬧到你明,陳啟宗直斥泛民癱瘓政府施政,拖香港經濟發展嘅後腿,保持一貫言論火爆本色。

言猶在耳,尋日輪到棋哥做最後一擊,佢嘅笑容比哥頓同陳啟宗燦爛,但係炮轟泛民嗰把口一樣咁重手。佢話總辭係政治騷,泛民議員玩補選更加係多此一舉,佢拋低一句「家和萬事興,家衰口不停」,即係暗寸盡泛民成日吵吵鬧鬧佗衰家。

立法會政制事務委員會聽日就政改諮詢方案舉行首場諮詢會,而呢三個重炮手喺諮詢會前接力式輪流發炮,炮口仲一致對準泛民,肯定唔係巧合咁簡單,睇嚟呢場追打泛民大戰,相信仲有排打。