審計署日前發表審計報告，點咗一批大花筒公營機構嘅名，名單水蛇春咁長。嗱，話口未完，本報又踢爆職業訓練局用巨額公帑起超豪華校舍。

話說職訓局獲政府資助喺調景嶺起兩幢新校舍，耗資高達十二億元，因為其中一幢，即係香港知專設計學院，採用超豪華設計。點豪法呀？架勢咯，校舍由空中平台同埋四幢玻璃塔樓組成，好似一張「白紙」浮喺空中咁，仲喺校舍內起咗全香港離地最高嘅中空電梯，離地成十二層樓咁高。咁豪華嘅建築，建造費實係唔平啦。有人踢爆，政府嘅撥款超過標準成一倍咁多。

職業訓練局嘅職責係要向市民提供職前教育，係人都知道，辦院校唔可以靠超豪包裝，而要重視教學質素，就算校舍再豪華，真係成為地標，如果教學素質唔好，都培養唔出人才啦。世界上有邊間名校係靠豪華校舍成名㗎？

如果職訓局真係有本事，可以自己籌款建校，起到幾豪都冇人會話你。但係家陣係用公帑建校，點可以亂使錢呀？所以有業界人士要求政府向公眾解釋，點解要搞到咁豪華，比如講，點解要起離地最高嘅中空電梯，對教學有乜嘢幫助？

之不過，職訓局係唔會聽得入耳嘅。佢哋講到明，要將呢個校舍發展成全港最大嘅設計學院，仲要變成調景嶺嘅地標。咁即係點呀？好簡單啫，用內地官場術語，叫做「打造政績工程」。

近年內地嘅地方政府都熱衷呢家嘢，嗰班官員唔理中央嘅禁令，斥巨資起樓堂館所，政府辦公大樓一間比一間豪華，有啲市政府辦公樓同美國白宮都有得揮。對呢種揮霍公帑嘅做法，中央早就忍無可忍，正全力查處。但勢估唔到，香港呢班敗家仔好學唔學，學埋晒內地啲衰嘢。咁搞落去，唔使幾耐，內地官場所有醜惡現象都會搬晒嚟香港嘞。叮！

職訓局大花筒固然值得叮，但係講到尾，最大嘅大花筒係特區政府。唔好睇班高官推動基建無心無力，但係講到起新政府總部就不知幾生猛，大拿拿掟咗六十幾億，打造呢個政績工程。

上樑不正下樑歪，政府帶頭亂使公帑，各部門同公營機構有樣學樣。咁樣你Fing我又Fing，就算庫房係金山，都有散盡嗰一日啦。睇嚟全港納稅人應該齊心合力，叮爆班大花筒鎯鎯！