譚志源早喺八月一號已經就任特首辦主任，距離依家四個月有多，而接佢手做副局長嘅黃靜文都喺上個月頭履新啦，但政府新聞網竟然仲播埋啲Out晒嘅舊料，市民分分鐘會被誤導。犯埋啲咁嘅錯誤，新聞處處長「米高」黃偉綸又點講得過去呀！

米高同譚志源同期坐音樂椅升職，官場話佢哋係「真兄弟」，依家大家入埋煲呔曾嘅心戰室，但政府新聞網顯示譚志源仲未升職，唔通米高眼紅譚志源官階同人工都高過佢？

咁又未必。米高上任呢三個多月嚟，就因為煲呔曾政府倒行逆施，例如驗毒計劃、施政報告又涉嫌「慳電膽益親家」同「雷曼弟婦」醜聞，以至近日推出嘅政改諮詢方案，單單都杰撻撻，米高淨係救火都救唔切，仲邊得閒理個網頁吖！

仲記得米高上任時下巴輕輕咁話已經準備好迎接做處長嘅挑戰，預咗深宵都要接聽傳媒嘅電話，睇怕佢發夢都估唔到，煲呔曾會咁好帶挈，做到佢氣咳。