豬流感喺香港爆發七個幾月，每次有重大疫情出現，衞生防護中心總監曾浩輝都會向傳媒講解，令佢人氣急升，好多小學生成為佢「粉絲」，每當有學校爆發流感，衞生防護中心人員都要去學校視察，同學仔見到佢哋就好興奮，以為「曾浩輝叔叔嚟喇，又可以停課喇」！
曾醫生尋日向樹仁大學新聞與傳播學系學生講解人類豬流感最新進展，面對二百幾名學生，唔少仲係將來會同佢過招嘅記者，佢仲分享咗同傳媒嘅關係。
原來佢喺九六年首次喺電視出鏡，仲形容自己出鏡經驗「老餅」，起初成日撞板，後來要去政府舉辦嘅傳媒訓練班學嘢。佢話傳媒成日批評政府「隱瞞」、「麻木不仁」、「中途轉軚」、「行政混亂」，呢啲批評令佢制訂措施時會考慮市民嘅需要，又透露平日都有機會同傳媒私下交往，但唔代表「friend 咗」，傳媒就唔會鬧佢。